Rasmiy munosabat

2025-11-09

Rasmiy munosabat

“Andijonda terimchi ayollar bir oydan buyon paxta pulini ololmayapti. Klasterning fermerlardan milliardlab qarzi borligi aytilmoqda” mazmunidagi 08.11.2025 yilda “Daryo” internet-nashrida e’lon qilingan maqola yuzasidan Andijon viloyati Kambag‘allikni qisqartirish va bandlik bosh boshqarmasi Davlat mehnat inspeksiyasi tomonidan quyidagilar ma’lum qilinadi.

O‘rganishlar davomida Marhamat tumanida faoliyat yurituvchi “Marhamat tekstil” MChJ klasteri tomonidan 2025 yil holatiga tumandagi jami 53 ta fermer xo‘jaligidan 11 425 tonna paxta xomashyosi qabul qilingani, ushbu hajm uchun 18 mlrd 765 mln so‘m terim pullari to‘lanishi lozimligi aniqlangan. Shundan 18 mlrd 165 mln so‘m to‘lovlar amalga oshirilgani, 600 mln so‘m qarzdorlik saqlanib qolganligi ma’lum bo‘lgan.

Davlat mehnat inspeksiyasi tomonidan 10.11.2025 kuni klaster rahbari nomiga ish haqini o‘z vaqtida to‘lash bo‘yicha bajarilishi majburiy bo‘lgan yozma ko‘rsatma berilgan.

Ko‘rsatma ijrosi yuzasidan “Marhamat tekstil” MChJ tomonidan qo‘shimcha moliyaviy hisob-kitoblar taqdim etilib, umumiy 12 574 tonna paxta xom ashyosi uchun 22 mlrd 634 mln so‘mlik terim pullari hisoblangan. 10.11.2025 yilga qadar 21 mlrd 350 mln so‘m to‘lovlar amalga oshirilgani, 1 mlrd 284 mln so‘mlik qarzdorlik mavjudligi qayd etilgan.

Davlat mehnat inspeksiyasining 10.11.2025 yil kungi ko‘rsatmasiga muvofiq:

• 10.11.2025 kuni — 600 mln so‘m,

• 11.11.2025 kuni — 684 mln so‘m

miqdoridagi terim pullari fermer xo‘jaliklari hisob raqamlariga to‘liq o‘tkazilishi ta’minlangan.

Natijada klaster tomonidan terim pullari bo‘yicha mavjud qarzdorliklar 12.11.2025 yil holatiga to‘liq bartaraf etildi.

Murojaat bo‘yicha belgilangan tartibda choralar ko‘rildi va fuqarolarning o‘z vaqtida murojaatlari to‘liq qondirildi.